हा झंझावात कुणाचा मज कधीच कळले नाही

त्या कोमल प्रेम-क्षणांची
भावनात गुंफण झाली
शब्दांच्या अर्थाचीही
डोळ्यात बाहुली झाली

काय झालो माझा मीही
मज मजला उमजले नाही
गतस्मृतींची उजळण झाली
हे काय कमी नाही?

त्या उत्कट भावनांच्या
खळखळणाऱ्या फेनिल लाटा
वादळात हिन्द्कळणाऱ्या
माझ्या मनातील नावा

माझा माझ्यावरती
कसला ताबा उरला नाही
मी तुला दुखवले ह्याचे
पळभरही विस्मरण नाही

आता शोधू कुठे कश्या ह्या
व्युहातील प्रकाश वाटा
अंधाराच्या गर्भामधुनी
आता माझी सुटका नाही

वागलो चुकीचा जरी मी
तुजला दुखावायाचा हेतु नव्हता
हा झंझावात कुणाचा
मज कधीच कळले नाही...